Send bønarevni...

Vælkomin at senda okkum bønarevni, sum verða løgd á heimasíðuna og í bønarbólkin hjá PODAS á Facebook: PODAS Bøn.

Skriva stutt og greitt og ikki nevna nøvn, uttan at viðkomandi hevur givið loyvi til tess. Vit hava tagnarskyldu.

Soleiðis vera vit mong sum biðja saman við tær og øðrum. Takk, at tú eisini biður fyri bønarevnunum niðanfyri.

"Fyrst av øllum áminni eg tá um, at tað verða hildnar bønir, ákallanir, fyribønir, takkargerðir
fyri øllum menniskjum." (1. Tim. 2,1)

Send bønarevni. Trýst her...

Ella send SMS til: 597777.

BØNAREVNI:

20. jan. 2022
Bøn fyri fyri teimum forfylgdu kristnu um allan heim: Góði Gud og Faðir okkara. Tú elskar øll menniskju og hevur alt vald í himli og á jørð. Harri, vit hava júst hoyrt um støðuna hjá brøðrum og systrum okkara kring allan heimin, hvussu tey verða forfylgd, fongslað, pínd og dripin fyri títt navns skuld.
Himmalski Faðir, síggj í náði til hesi systkin okkara. Verj tey frá øllum illum, gev teimum styrk og troyst í neyðini og styrk trúgv teirra. Steðga øllum harðskapi og allari forfylging og lat systkin okkara kenna seg bornan av tær og av bønum teirra kristnu.
Harri Jesus Kristus. Hjálp og styrk tey, sum royna at hjálpa teimum forfylgdu og neyðstøddu og minn okkum á, framhaldandi at biðja fyri teimum og hjálpa eftir førimuni. Í Jesu navni. Amen.

6. des. 2021
Áheitan frá bønarvini. Kunnu tit biðja fyri ungari gentu, ið var út fyri ferðsluvannlukku í dag. Hon er send niður í kvøld. Vit leggja hana og familju hennara í Guds hendur 

25. nov. 2021
Biðið við okkum fyri eldri hjúnum, sum hava stórar trupulleikar sínámillum. Har er kuldi innanveggja. Men Gud hoyrir bøn, takk og lov!

24. nov. 2021
Her er ein áheitan frá bønarvini: Kunnu tit biðja fyri konu, ið er ógvuliga sjúk. Hon hevur fingið staðfest krabbamein. Takk fyri.

16. nov. 2021
Góðu tit! Kunnu tit biðja fyri kvinnu, ið er álvarsliga sjúk og familjuni. Liggur í resperator, hevur coronu fyri aðru ferð.

08. nov. 2021:
Áheitan frá kvinnu um forbøn fyri dóttir og ommubarni. Bið Harran verja og varða tey frá øllum illum, eisini frá ávirkan av øðrum átrúnaði. Bið Gud Faðir á himni um einglavernd og verjugarð um dóttrina og ommubarnið í Jesu navni. Takk fyri.

03. nov. 2021:
Takk, Gud, fyri alt, sum hendi, fyri gávur, tú oss ber, fyri tíð, sum er at enda, fyri stundina, sum er!
Takk, Gud, fyri ljósa várið, fyri myrka, kalda heyst, fyri hvørt hitt gloymda tárið, fyri hjartafrið og treyst.

29.okt. 2021:
Áheitan frá Open Doors: Bið fyri kristnum youtubara.
Youtube er ein góður plattformur hjá kristnum at deila evangeliið. Tó er tað ikki uttan vanda í muslimska heiminum. Muhammad Kece varð nýliga handtikin, tí hansara youtube rás hevði “spottandi” tilfar mótvegis Islam. Í ringasta føri kann hann fáa 5 ár handan rimarnar. Eftir handtøkuna varð hann avbardur í fangaklivanum av hinum fangunum, ið vóru muslimar. Bið fyri likamliga og sálarliga grøðing. Bið fyri, at teir, sum bukaðu Muhammad, skulu finna Jesus.

27. okt. 2021:
Góðu brøður og systrar í Harranum: "Verið áhaldandi í bønini, við tað at tit eru árvaknir í henni við takkargerð." (Kol. 4:2)

18. okt. 2021:
Kvøldbøn: Gud, skapari vár og harri. Tøkk fyri dagin, sum nú er um at vera liðin, fyri arbeiðsins signing og nú fyri hvíldina og náttarsvøvnin. Fyrigev okkum, Harri, allar syndir okkara, illavorðin orð og illavorðnar gerðir og tankar. Eisini tað, vit áttu at havt gjørt, men sum vit ikki gjørdu, biðja vit teg um at fyrigeva. Harri, vit elska teg ikki av øllum hjarta, sál og sinni og heldur ikki næsta okkara sum okkum sjálv.
Miskunna okkum, Harri, og hjálp okkum í komandi døgum betur og betur at tæna tær.
Signa tú, Gud, kirkju tína og lat orð títt hjá øllum tjóðum hava frítt at fara. Signa land okkara og øll heimsins lond. Halt hond tína yvir sjófólk okkara og landsmenn okkara í fremmandum londum.
Varðveit løgting og landsstýri og alt lógligt yvirvald. Varðveit okkum og øll okkara kæru.
Veit okkum góða hvíld í vissuni um fyrigeving syndanna. Í trúnni á Jesus Krist, sum doyði fyri okkum, biðja vit teg um at lata okkum hvíla trygg og eftir okkara síðsta blund rísa upp til ævigt lív. Amen.

18. okt. 2021:
Morgunbøn: Eg takki tær, himmalski faðir mín, við Jesusi Kristi, elskuliga syni tínum, fyri at tú hesa nátt hevur varðveitt meg frá øllum skaða og váða; og eg biði teg, at tú eisini í dag vilt varða meg frá synd og øllum illum, so at alt yrki mítt og øll atferð mín má líka tær væl. Tí eg gevi meg við likami og sál og øllum lutum í hendur tínar. Tín heilagi eingil veri við mær, fyri at illimaður ikki skal fáa nakað vald á mær! Amen.

13. okt. 2021:
Bøn fyri PODAS: Góði bønarvinir. Nú eru lýsingarnar til PODAS-skeiðini í vetur løgd á heimasíðuna www.podas.fo, facebook, instagram og aðrastaðni og tilmeldingim er byrjað. Bøn og vón okkara er, at undirtøkan verður góð og at mong vilja tekna seg til skeiðini kring landið. Tað er eitt stórt arbeiði at fyrireika og skipa øll hesi skeiðini, at fáa høli, floksleiðarar og undirvísarar v.m.
Vit í leiðsluni fyri PODAS heita á tykkum øll, at biðja fyri fyrireikingunum og at mong vilja tilmelda seg. Vit takka hjartaliga fyri forbøn. Má Harrin signa tykkum øll og geva tykkum sín frið í Jesu navni. Amen.
Kærar heilsanir,
Bergur og Ásbjørn

08. okt. 2021
Bøn fyri Íslandi: Eg vil fegin spyrja, um bønarvinir vilja biðja fyri íslendsku tjóðini, at menniskju vilja venda um til Gud Faðir og taka Guds orð sum SANNLEIKA og IKKI BERT SUM UNDIRHALD! Amen og takk fyri.

07. okt. 2021
Ein bøn av Frans í Assisi:
Harri, lat meg sáa kærleika, har hatrið grør, fyrigeving, har gjørdur verður órættur, semju, har ið klandur valdar, sannleika, har ið lygnin er í hásæti, trúgv, har ivin gnagar, vón, har ið mistreysti finst, ljós, har ið myrkursins andar halda til.
Lat meg bera gleði til bústað sorganna. Lær meg ikki at leita eftir troyst frá øðrum, men sjálvur at veita troyst.
Heldur at vilja skilja onnur, enn sjálvur at vera skiltur, lat meg sjálvur elska, ikki sjálvur krevja kærleikan, lær meg at geva og ikki fáa afturfyri. Amen

02. okt. 2021
Áheitan frá kvinnu: Kunnu tit, saman við mær, biðja fyri einum nýføðingi, sum er illa fyri. Bið Gud um fulla grøðing í Jesu navni. Takk. Gud er mentur.

26. sep. 2021
Bøn fyri Afganistan, eftir Bergur Debes Joensen: Góði Faðir á Himni! Vit vita ikki, hvat vit skulu siga ella biðja. Vit síggja og hoyra um neyð og ræðuleikar. Men tú ert Gud. Tú hevur alt valdið og ikki menniskju. Tú ert okkara borg, styrki og vón.
Síggj í náði til afganska fólkið. Birt frið! Bara tú kanst gera tað ómøguliga møguligt. Eingin søk er tær ógjørlig. Steðgað atsóknini móti minnilutum og kristnum í landinum! Bend hevndarhug til vilja, at byggja upp hetta krígsherjaða land við virðing fyri gentum og kvinnum.
Verj tey flýggjandi, tey sjúku og tey veiku. Lat hjørtu og hurðar upp fyri teimum, sum óttast píning og avrætting vegna trúgv sína. Gev teimum friðskjól, sum vilja flýggja. Steðgað øllum óskili og ótta. Lat skilvísi og rættvísi ráða. Reis kvinnur og menn við dirvi at gera ítøkiligan mun. Gev felagsskapum og stjórnum vísdóm, at samráðast til bata fyri allar ættarbólkarnar í Afganistan. Lat hjálp náa fram til øll treingjandi. Lat lógarsmíð gerast, sum fremur frælsi og rætt fyri øll.
Ver við fólki tínum í Afganistan og um allan heim. Lat gleðiboðskapin um kærleika, náði og fyrigeving vinna fram í hjørtum okkara. Hoyr okkum í Jesu navni Amen!

25.sep. 2021
Kvinna skrivar soleiðis: Kunnu tit biðja fyri mær, at eg skal kenna linna í sálini og sleppa av við stúran sum fyllir nógv, og at Harrin skal geva forstáilsi til tey sum ikki skilja meg. Takk fyri.

21. sep. 2021
Áheitan frá kvinnu: Vilja tit biðja um at eg skal sleppa av við heilivág og aðrar keðiligar støður, sum eg eri í. Jesus veit. Takk fyri.

20. sep. 2021
Góðu bønarvinir! Kunnu tit biðja fyri fyrireikingunum til PODAS-skeiðini í vetur. At tað má gangast væl at fáa floksleiðarar og at mong vilja tekna seg til skeiðini. Takk fyri og Guds ríku signing.

Send okkum eini boð